雖然隔晚美股回軟，標指跟納指由紀錄高位後回落，分別跌37點及105點；道指則從盤中跌逾500點至收市跌幅收窄至260點。美股都算強勁，次次以為大冧檔都拗腰收復部份失地。至於港股呢，跌足八日，恒指瀉逾2000點後，今日開市續挫逾300點後反彈，半日反彈逾百點，250日線(27116)，即傳統牛熊分界線失而復得，只要企得穩，個市未死得。
恒指低開21點，開市無耐曾升逾百點，但A股因為內地8月消費價格指數(CPI)低過預期腳軟，港股掉頭向下，半日最多跌291點，見26861點，創2021年新低，但穿27000點後有趁低吸納買盤，大市止跌回升，收復250日線。半日恒指報收27330點，回升177點；國指則回升31點，報收9853點；恒科指升60點，報收7382點。
藍籌股方面，友邦(01299)反彈1.2%，重上95元重要支持位；安踏(02020)噚日舉行投資者日，公布上半年零售額增逾35%，更獲多間大行調高目標價，半日股價升6.5%。藥明生物(02269)半日升5.3%；新世界(00017)旗下柏傲莊III兩幢樓宇結構不達標要拆卸重建，股價半日跌5.3%，不過公司有擔當，估計放棄交易買家應該數目唔多，股價落到36元水平，可能係買入嘅好機會。
科網股先跌後回升，ATMX之中，阿里(09988)繼續跌1.2%，失守200都唔識彈，睇嚟200有機會由支持變阻力；騰訊(00700)、美團(03690)跟小米(01810)回升，但騰訊略嫌彈力不足，半日反彈不足1.8%，美團跟小米則回升逾4%。快手(01204)話咗落地獄，唔知要落去第幾層，今日都仲未識彈，更被大摩連劈兩級叫沽售，股價半日再創新低，跌5.8%更成為跌幅最大科指成份股。
餐飲股個別發展，火鍋股終於識得彈，海底撈(06862)彈7.6%，為升幅最大藍籌股，同系頤海國際(01579)回升5.4%；呷哺呷哺(00520)升4.9%。另外，九毛九(09922)升2.6%；不過半新股奈雪的茶(02150)創上市新低，跌0.3%，未能跟其他餐飲股反彈。
大市八連跌後，穿27000後即彈，剛好砍晒重牛區，照理反彈係正常，問題係恒指需要盡快重返27500點，即3月底低位。如恒指能盡快27500點水平運行，今日跌穿二萬七可視為假穿，但如果三個交易仍未能重返27500企穩再反彈，港股死貓彈後，仍有可能下跌，再度失守二萬七則二萬六係最低消費。相反，重返27500企穩，而月初至今已跌逾二千點，單月波幅已足夠，本月稍後時間，港股仍可重返二萬八之上，繼續喺大型長方型區間中上落。
麥狄文
(徐狄怡‧證監會持牌人)
發佈留言