往年喺回歸紀念日，阿爺通常都會對香港「送禮」贈興，但今年則未有表示，港股就借呢個藉口繼續調整。恒指恒指高開31點，開市價28859點已見半日高位，甫開市即受壓，相繼失守10日線(28799點)、20日線(28770點)及50日線(28727點)，盤中多跌516點，見28311點，創6月22日以來新低。恒指中午收報28365點，跌462點；國企指數報10441點，跌222點；恒科指再失八千關，半日跌250點，跌幅超過3%，報收7905點。周末前夕半日成交增至945億元，沽壓都唔細。
美股標指連續六個交易日創新高後，高位壓力漸增，市場擔心美股隨時出現較大幅度調整，港股驚定先，加上A股走軟，港股唔跟美股升仲要先插水，認真失禮。藍籌股中，今早藥明生物(02269)曾創新高逆市向上，可惜不敵整體氣氛，半日倒跌0.2%。而恒安(01044)跟中海外(00688)則逆市上升。
廣東省市場監督管理局表示將突出競爭執法，推動數字經濟促進條例盡快出台。同時有消息指要嚴懲殺熟，二選一等壟斷行為，平台股全部插水，阿里(09988)、美團(03690)沽壓較明顯，小米(01810)一直受反壟斷法影響有限，呢次躺著也中槍，半日齊齊跌逾3%。騰訊(00700)跟京東(09618)別跌0.9%及1.4%。本以為市場已逐漸消化有關內地對平台股進行反壟斷審查及打壓，但阿爺久唔久又出招，令到缸邊友不得不退縮。
至於新能源股炒咗一輪，今日回吐插水力度大，有口痕友話唔覺意跟炒又遭割韭菜，其實呢個板塊低位反彈咗唔少，而高位蟹貨數目更加驚人，稍為熄燈走鬼，已嚇到有份參與炒作嘅缸邊友雞飛狗走，整個板塊走軟，跌幅由4%至8%不等。新能源汽車同樣軟，吉利(00175)跌6.3%，藍籌股中表現最差，其他電動車股跌逾2%至4%不等。
國際油價升至兩年半高位，石油股跟油服股逆市向上，中石油(00857)剛發盈喜，半日升近2%，其他石油股亦錄得咁上下升幅，估計呢個板塊近日會陸續有公司發盈喜，短線可跑贏大市。
之前阿Man提過嘅兩隻物管新股越秀服務(06626)同中駿商管(00606)招股時反應平平，但上市後表現唔錯，今日中駿商管首掛，逆市做好，而越秀服務早段亦創新高。其實有時IPO爆燈倍數唔多嘅股份，若果基石投資者陣容強勁，因為IPO貨無派得太散，反而更有利上市初期表現。
麥狄文
(徐狄怡‧證監會持牌人)
發佈留言